CEBU CITY- Gikuwestiyon ni Prof. Danilo Arao, Convenor sa Kontra Daya, ang bag-ong postponement sa Barangay ug Sangguniang Kabataan Elections o BSKE, diin gibalhin na sa 2028 ang maong piniliay.
Matud ni Arao, dili na makatarunganon ang padayon nga pagpalawig sa termino sa mga barangay ug SK officials, nga gikan sa tulo ka tuig, nahimong upat ka tuig ug posibleng mahimong lima ka tuig tungod sa bag-ong postponement.
Sumala pa niya, wala’y siyentipikong basehan nga ang kalidad sa pagdumala sa usa ka opisyal mahimong masukod base lamang sa kadugayon sa iyang termino.
Giingon ni Arao nga ang tulo ka tuig nga termino igo na aron mapakita sa usa ka opisyal ang iyang abilidad ug serbisyo sa publiko.
Matud pa niya, ang maong termino makahatag usab og higayon sa uban, ilabina sa mga kabatan-onan, nga makapartisipar sa pagdumala ug makaserbisyo sa ilang komunidad pinaagi sa eleksyon.
Hinungdan, nga daghan na ang nagparehistro isip mga botante, lakip ang mga first-time voters ug mga kabatan-onan nga nagpaabot unta nga makabotar ug maka-exercise sa ilang right of suffrage sa umaabot nga eleksyon.
Gikuwestiyon usab ni Arao ang mga gasto sa gobyerno alang sa pagpangandam sa eleksyon nga gikatakdang ipahigayon unta karong Nobyembre, ilabina human kini gi-postpone na usab.
Samtang, giingon ni Arao nga ang postponement sa BSKE mahimong i-challenge sa Supreme Court aron masuta ang legal nga basehan sa maong lakang, lakip na ang posibleng epekto niini sa katungod sa mga botante sa pagpili sa ilang mga lider.
Matud niya, nakig-coordinate na sila kang election lawyer Atty. Romulo Macalintal alang sa posibleng legal nga mga lakang may kalabotan sa postponement sa BSKE.
Gipasiugda ni Arao nga importante nga masuta kung adunay igo, klaro ug lig-on nga legal nga basehan ang padayon nga postponement sa Barangay ug Sangguniang Kabataan elections, ilabina kon may kalabotan sa right of suffrage o katungod sa mga botante nga makapili sa ilang mga opisyal.
