Napildi ang Alas Pilipinas Men’s team sa ilang unang duwa batok sa South Korea sa Men’s Volleyball Pool D sa 2026 Asian Games, diin natagak sila sa “straight sets” nga adunay iskor nga 16-25, 25-27, ug 22-25.
Naglisod ang Pilipinas sa unang set tungod sa mga sayop sa “service,” nga gipahimuslan sa South Korea aron makuha ang kadaugan nga 25-16.
Mas hugot ang kombati sa ikaduhang set diin dali nga nakaposte og upat ka puntos nga labaw ang Pilipinas, apan nakabawi ang Korea sa hinapos nga bahin sa set. Nanguha og labaw nga 21-20 ang Korea human sa ilang 3-0 nga “run,” nga nagbutang sa Pilipinas sa delikadong sitwasyon.
Ingon man nga naningkamot ang Alas Pilipinas hangtod sa katapusan, apan sa katapusan, nakuha gihapon sa Korea ang set sa iskor nga 27-25.
Sa ikatulo nga set, misuway pag-usab og pakigbatok ang Pilipinas, apan wala nila mapugngi ang South Korea sa pagtapos sa duwa sa iskor nga 25-22.
Gipangulohan sa kapitan sa Alas Pilipinas Men’s team nga si Bryan Bagunas ang opensa pinaagi sa iyang 15 ka puntos, samtang si Joshua Magalamaan nakatala og 13 ka puntos, si Leo Ordiales midugang og 11, ug si Marck Espejo miamot og 7 ka puntos.
Apil sa Pool D uban sa Pilipinas ug South Korea ang China ug Chinese Taipei.
