Nagpabiling akusado sa kasong graft si kanhing Department of Public Works and Highways Secretary Manuel Bonoan human gisalikway sa Sandiganbayan Second Division ang hangyo sa prosekusyon nga tangtangon siya isip akusado sa maong kaso.
Nalambigit si Bonoan sa giingong pamaagi sa pagdawat og “kickback” o ilegal nga komisyon nga nagkantidad og P213 milyon, may kalabotan sa mga proyekto alang sa pagpugong sa baha sa Bulacan.
Gipahibalo kini sa anti-graft court atol sa pre-trial conference alang sa kasong graft nga giatubang ni Bonoan uban ni Senator Jinggoy Estrada.
Lahi kini sa kasong plunder nga giatubang usab ni Bonoan, diin gitugotan sa Sandiganbayan Fifth Division ang pagtangtang kaniya isip co-accused aron makaserbisyo siya isip state witness.
