Andam motabang ang Cebu City Government sa kapin syete-mil ka parolees sa siyudad, pinaagi sa mas lig-on nga koordinasyon tali sa gobyerno, pribadong sektor ug ubang stakeholders.
Kini ang gipadayag ni Cebu City Mayor Nestor Archival atol sa Stakeholder Summit 2026 nga gihimo niadtong Septiyembre 29. 2026, matud ni Archival, kabahin sa direksyon sa Cebu City ang pagtabang sa tanan ug pagpalig-on sa usa ka siyudad nga sustainable, smart ug inclusive.
Dugang pa sa mayor, gusto sa city government nga mahimong kabahin sa maong paningkamot ang mga parolees ug probationers, ug nanghinaot siya sa padayong tabang sa mga stakeholders nga mitambong sa summit.
Gihisgutan usab ni Archival ang kapin syete-mil ka parolees nga kinahanglan og nagkalain-laing porma sa suporta, sigon niini, importante nga mahibal-an ang mga skills ug resources nga anaa aron matino kung asa nga mga programa ug serbisyo mahimong ikatabang sa mga kliyente.
Lakip sa iyang gihisgutan ang posibilidad sa paghatag og mga oportunidad sa trabaho, lakip na ang job order positions alang sa mga batan-on nga parolees o probationers nga kwalipikado.
Gipasiugda usab sa mayor ang importansya sa training, diin iyang gihisgutan ang posibilidad sa pag-apil sa TESDA aron makatabang sa skills training sa mga kliyente.
Gihisgutan usab ang posibilidad nga matabangan ang mga parolees pinaagi sa mga proyekto sa siyudad, lakip na ang mga kalihokan may kalabotan sa waste management ug uban pang panginahanglan sa lokal nga pangagamhanan.
Samtang, gipalig-on sa Cebu City Parole and Probation Office Number 1 ang suporta alang sa mga probationer ug parolees pinaagi sa Project Labang ug Project Amuma.
Gilauman sa Cebu City Parole and Probation Office Number 1 nga pinaagi sa padayong suporta sa city government, pribadong sektor, volunteers ug uban pang stakeholders, mas maandam ang mga probationer ug parolees sa ilang pagbalik sa komunidad ug sa pagsugod pag-usab sa ilang kinabuhi.
