Gipalig-on sa Department of Education (DepEd) ang mga protocol sa operasyon niini aron maandam ang mga eskwelahan sa posibleng epekto sa El Niño sa sektor sa edukasyon.
Matod ni Education Secretary Sonny Angara, lakip sa mga estratehiya ang padayon nga pagtimbang-timbang sa mga risgo, pag-update sa mga contingency plan, ug pag-andam og flexible nga mga pamaagi sa pagkat-on aron masiguro ang pagpadayon sa edukasyon bisan pa sa posibleng epekto sa El Niño.
Gimandoan usab ang mga kawani sa DepEd nga palig-onon ang paglakip sa mga konsepto bahin sa climate change sa kurikulum, subay sa direktiba ni Presidente Ferdinand “Bongbong” Marcos Jr.
Dugang pa, gimandoan ang mga eskwelahan nga pauswagon ang mga pasilidad alang sa tubig, sanitasyon ug hygiene, lakip ang pagsiguro sa access sa luwas nga tubig nga mainom ug hustong bentilasyon sa mga classroom.
Tumong sa mga lakang nga mapanalipdan ang kahimsog ug kaayohan sa mga estudyante ug magtutudlo, ilabi na samtang nagkaduol ang mas init nga mga bulan.
