Gitugotan sa Senate Impeachment Court si Anti-Money Laundering Council (AMLC) Executive Director Ronel Buenaventura nga motestigo bahin sa mga transaksyon sa bangko ni Vice President Sara Duterte ug sa iyang bana nga si Atty. Manases Carpio.
Matod ni Senate Impeachment Court Presiding Officer Francis Escudero, ang kasamtangang mga probisyon sa balaod bahin sa pagka-confidential sa mga transaksyon sa bangko dili hingpit o “absolute,” tungod kay dili man pasibo nga institusyon ang AMLC sukad pa sa sinugdanan.
Sa wala pa ang maong desisyon, misupak si Defense counsel Atty. Mark Vinluan sa pagpresentar kang Buenaventura isip saksi sa impeachment trial.
Bisan pa sa iyang pahayag nga walay gitago ang Bise Presidente, gipasiugda ni Vinluan nga ang mga datos kinahanglan moagi una sa tukmang proseso sa pagberipika subay sa balaod ug dili angay ipresentar sa publiko sa paagi nga malisyoso o gituyo aron mahimong politikanhong isyu.
Gikutlo ni Vinluan ang Section 8-A sa Anti-Money Laundering Act, nga gisulod pinaagi sa Republic Act No. 11521, nga naglatid sa obligasyon sa AMLC ug sa Secretariat niini nga panalipdan ang impormasyon nga ilang nadawat o naproseso ug dili kini ibutyag sa bisan unsang paagi kung nahibaloan kini tungod sa ilang katungdanan.
Apan, Matod ni Escudero, miuyon ang korte nga kinahanglan konsiderahon ang Section 8-A, apan wala kini magpasabot nga ang mga taho sa AMLC hingpit nang gawasnon gikan sa mga mando sa korte o compulsory process.
Gipasabot usab ni Escudero nga ubos sa Section 9-C, gidid-an ang mga covered person, lakip ang ilang mga opisyal ug empleyado, sa pagbutyag nga adunay taho bahin sa usa ka transaksyon nga sakop sa balaod o gikonsiderang kadudahan, lakip ang mga detalye o may kalabotan nga impormasyon niini.
Apan, sumala ni Escudero, sa kaso nga Republic v. Sandiganbayan, mihukom ang Korte Suprema nga ang maong pagdili magamit lamang sa mga institusyon nga nagsumite sa taho ug dili sa AMLC mismo.
