Gisaway ni Atty. Jojo Lacanilao, Lead Convenor sa Duterte Panagutin Network, kanhi diplomat practicing lawyer ang giingong luag nga pagpatuman sa mga balaod ug ang pagpabaya sa Commission on Audit (COA) sa pag-monitor sa pondo sa publiko.
Atol sa pakighinabi sa Bombo Newsteam kang Atty. Lacanilao, gikanayon niini nga gipahimuslan sa mga kurakot nga opisyal sa gobyerno bisan sa lebel sa local government unit (LGU) ang mga buslot sa balaod ug naggamit og mga pasangil aron makaikyas sa tulubagon sa ilang mga sayop nga binuhatan, samtang gitugotan sa COA nga magpadayon kini sa taas nga panahon.
Gipasiugda sa abogado nga nakalikay ang Bise Presidente sa pagsusi atol sa mga unang pagdungog sa Quad Committee sa wala pa molihok ang COA bahin sa mga kwestyonableng galastohan. Busa, gisaway niya ang dugay nga proseso kung modumili ang COA sa motion for reconsideration bahin sa mga “fund disallowance” usa ka desisyon nga kasagarang mokabat og unom ka bulan una mogawas ug gihimo kining ebidensya sa kahinay sa sistema.
Gihimug-atan usab ni Atty. Lacanilao, nga dili basta-basta nga madawat o makalusot ang “bare denial” o pagsalikway lamang nga walay gidala nga kongkreto ug espesipikong ebidensya bahin sa giingong sekreto o nakatagong kabtangan ug mga ginadiling bank transactions.
Sumala pa niini nga klaro nga adunay giplano ug gitudlo nga mga estratehiya gikan sa mga maayong abogado o accountant aron gamiton ang mga loophole sa balaod ug matago ang pipila ka bahin sa mga kabpropiedad pinaagi sa pagpagawas og mga manager’s check.
Gitataw niya nga isip usa sa mga tag-iya sa joint bank account, kanunay nga gipatuman sa balaod ang presumption nga nahibal-an sa usa ka co-account holder ang tanang lihok ug pagpagawas sa kwarta sa account.
