Gipailalom sa Yellow ug Orange Alerts ang 12 ka probinsiya sa nasud tungod sa gilaumang epekto sa Super Typhoon Rosal.
Sumala sa Department of the Interior and Local Government (DILG) – Central Office Disaster Information Coordinating Center (CODIX), gilaomang makasinati ang mga apektadong lugar og padayon nga pag-ulan ug kusog nga hangin tungod sa kalapad sa sakop sa bagyo.
Ubos sa Orange Alert (Alert Level Bravo) ang Batanes, diin gilaomang moabot sa 85 kilometros matag oras ang paghuros sa hangin, inubanan sa kusog ngadto sa grabeng pag-ulan.
Samtang, Yellow Alert (Alert Level Alpha) ang gipatumang sa 11 ka laing probinsiya, nga naglakip sa Abra, Apayao, Aurora, Cagayan, Ifugao, Ilocos Norte, Ilocos Sur, Isabela, Kalinga, Mountain Province, ug Quirino.
Gilaumang makasinati ang maong mga probinsiya og paghaguros sa hangin nga moabot sa 55 kilometros matag oras, lakip ang kasarangan ngadto sa kusog nga pag-ulan.
Ang mga apektadong lugar nahimutang sulod sa gibanabanang 780 kilometros sa sidlakan ug 650 kilometros sa kasadpan gikan sa sentro sa super typhoon, nga nagpakita sa kalapad sa lugar nga mahimong maapektuhan sa bagyo.
Gilaumang posibleng modaghan pa ang mga probinsiya nga ipailalom sa alerto samtang nagkaduol ang super typhoon sa yuta.
