Maayo na ang tanan tali sa aktor nga si John Lloyd Cruz ug sa host nga si Robi Domingo, human sa mga hungihong bahin sa usa ka komprontasyon niadtong miaging tuig.
Matod ni Domingo, ang nahitabo kaniadto “dili tinuyo” ug dugang niini nga kalit ang panghitabo, apan nagka-okay na ang duha.
Ingon man nga iyang gipasalamatan ni John Lloyd gumikan nakig-alayon siya sa nagkalain-laing mga manager, ingon man sa mga higala, aron maresolba ang mitumaw nga panagsumpaki sa ilang duha.
Mikaylap ang mga taho nga adunay tensiyon tali nila ni Cruz ug Domingo atol sa reception sa kasal sa simbahan nila ni Zanjoe Marudo ug Ria Atayde niadtong Disyembre 22. Ang duha gidapit isip mga bisita sa maong pribadong kalihokan, diin si Domingo ang nagsilbing host sa reception.
Sa iyang vlog, gitaho sa beteranong showbiz host nga si Ogie Diaz ang giingong komprontasyon, basi sa impormasyon gikan sa iyang tinubdan. Giingong nasakitan o na-offend si Cruz dihang gipangutana ni Domingo si Marudo kung unsa ang iyang gibati nga mahimong “Mr. Atayde.” Kini ang misunod nga pangutana human niya gipangutana ang pangasaw-onon kung unsa ang iyang gibati nga mahimong “Mrs. Marudo.” Dugang pa ni Diaz, nahitabo ang tensiyon sa may bar diin nakita sa ubang mga artista nga miduol si Cruz kang Domingo aron hisgutan ang maong pangutana.
