Nagpadala og sulat ang Iran ngadto sa United Nations (UN), nga naghangyo og aksiyon batok sa giingong pagpanghasi ug pagbabag sa kadagatan nga gipatuman sa Estados Unidos (US).
Matod ni Gholamhossein Darzi, ambassador sa Iran ngadto sa UN, ang pagbabag sa US sa mga katubigan nga ubos sa hurisdiksyon sa Iran usa ka klarong paglapas sa internasyonal nga balaod ug sa UN Charter.
Gipangayo sa Iran nga kondenahon ug isalikway sa UN ang mga taktika sa pagpanghadlok nga giingong gigamit sa US batok sa Islamic Republic of Iran.
Gipasiugda usab ni Darzi nga angay nga awhagon sa UN ang US nga hunongon dayon ang giingong agresyong militar batok sa Iran ug tangtangon ang pagbabag sa kadagatan.
Dugang pa sa Iran, kinahanglan nga tahoron sa US ang awtoridad sa UN ug manubag sa mga aksiyong giingong nakalapas sa internasyonal nga balaod.
