Gikatakda nga i-deploy ang kapin sa 3,700 ka mga personnel gikan sa kapulisan ug sa uban pa nga mga ahensiya aron sa pagsiguro sa kahapsay ug kalinaw atol sa pagpahigayon sa 20th ASEAN Defense Ministers Meeting, nga ipahigayon sa Dakbayan sa Lapu-Lapu, sa umaabot Oktubre 28-29, 2026.
Gipangulohan ang kalihokan ni PLTGEN. Neri Vincent Ignacio, Commander sa PNP Asean Security Task Group, PBGEN. Arnold Abad, Regional Director, sa PRO-7 ug Commander sa Task Group Central Visayas ug ni Lapu-lapu City Mayor Cindi King-Chan.
Atol sa gipahigayon nga send off ceremony sa Task Group Central kagahapon, Biyernes, Oktubre 23, 2026 pormal nang gideploy ang sumatotal 3,680 ka mga personnel nga naglangkob kini sa 2,312 nga sakop sa kapulisan, 478 nga sakop sa Bureau of Fire Protection, 341 nga sakop sa Philippine Navy, 214 gikan sa Philippine Army, 155 ka mga sakop sa Department of Health, 80 gikan sa Office of Civil Defense, 60 gikan sa Philippine Coast Guard, ug 30 gikan sa Bureau of Jail Management and Penology
Matud pa ni PLTCOL Rolan Aliser, tigpamaba sa PRO-7, magsugod ang deployment sa umaabot adlawng Lunes, Oktubre 26, 2026 didto sa Dakbayan sa Lapu-lapu kung asa ipahigayon ang mga pagpulong sa mga delegado sa ASEAN ug posibleng molanat ang deployment hangtud sa Nobyembre 1.
Subay niini, naka-heightened alert sa usab ang mga kapulisan alang sa pagpahingusog sa ilang seguridad atol sa naasoy nga kalihukan.
Gipasalig ni Aliser nga dili makabalda sa preparasyon sa Kalag-kalag 2026 ang maong deployment ug gipanglantawan usab nga atol sa deployment, makanselar ang mga mandatory leaves and absences sa mga kapulisan aron makatabang sa pagsiguro sa kahapsay ug kalinaw atol sa ASEAN Defense Ministers Meeting.
