Nakaangkon og samad ang duha ka pasahero human ang usa ka bus nga gituohang nawad-an og preno sa Barangay Liki, Sogod, niadtong Sabado, Oktubre 24, mga alas 8:50 sa buntag.
Giila ang mga naangol nga pasahero sa ilang mga alyas nga sila si Jessie, 28, ug Rina, 31-anyos.
Ang bus, nga gimaneho sa usa ka alyas Josue, 48-anyos, nga taga-Balilihan, Bohol, nagdala og 28 ka tawo, lakip na ang drayber ug konduktor.
Basi sa imbestigasyon sa Sogod Municipal Police Station, ang bus nagbiyahe gikan sa Maya Port sa Daanbantayan ug paingon kini sa Siyudad sa Sugbo.
Pag-abot sa taas nga bahin sa Barangay Liki, ang driver gituohang nakasinati og pagkapakyas sa preno ug nawad-an og kontrol sa sakyanan. Mitabok ang bus ngadto sa pikas lane una kini nabangga sa kilid sa dalan nga bakilid.
Ang mga naangol nga pasahero gidala sa Juan Dosado Memorial Hospital sa Damolog, Sogod, aron makadawat og medikal nga pagtambal.
Gikanayon usab sa driver ug sa inspektor nga andam sila nga abagahon ang mga galastuhan sa pagpatambal sa mga naangol nga pasahero. via Bombo Rexmond Omega
