Mipasalig ang Blasert Force 568 Inc. ug Unify Philippines sa ilang suporta sa blood donation drive sa Bombo Radyo nga ipahigayon sa Nobyembre 14 sa SM Seaside, Cebu City.
Tumong sa kalihokan nga dasigon ang publiko sa boluntaryong pagdonar og dugo aron makatabang sa mga pasyente ug sa mga nanginahanglan og suplay sa dugo.
Matod ni Archilles “Kit” Coronel, founder, chairman, ug chief executive officer sa Blasert Force 568 Inc., kabahin sa prayoridad sa ilang organisasyon ang pagserbisyo sa komunidad, ilabi na sa sektor sa panglawas.
Gitinguha sa grupo nga makapadala og labing menos 50 ka donors ug giawhag ang ilang mga miyembro ug ubang organisasyon sa Cebu ug kasikbit nga mga lugar nga moapil sa blood donation drive.
Samtang, gipasalig usab ni Florante Coronel, adviser sa Unify Philippines, ang suporta sa organisasyon pinaagi sa Unify Justice Chapter, nga dugay nang miapil sa maong inisyatibo.
Personal usab nga modonar og dugo si Florante Coronel isip pagpakita sa iyang suporta sa kampanya. Giawhag niya ang mga miyembro ug higala sa Unify nga moapil aron makatabang sa mga nanginahanglan.
Gipasalamatan sa duha ka representante ang Bombo Radyo Cebu sa pagdapit kanila nga mahimong kabahin sa maong kalihokan.
Gipasiugda usab ni Florante Coronel ang kamahinungdanon sa padayon nga pagpahibalo sa publiko bahin sa blood donation drive aron mas daghan ang modonar ug makaamgo sa bili sa boluntaryong pagdonar og dugo.
Pinaagi sa maong panaghiusa, gidasig ang publiko ug nagkalainlaing organisasyon nga moapil sa blood donation drive isip konkretong paagi sa pagtabang sa isigka-tawo ug pagluwas sa kinabuhi.
