Misupak ang defense team ni kanhi Presidente Rodrigo Duterte sa hangyo sa prosekusyon sa International Criminal Court (ICC) nga dawaton isip ebidensya ang mga naunang narekord nga testimonya sa duha ka saksi kalabot sa kaso sa ‘crimes against humanity’ nga giatubang sa kanhi pangulo.
Gipasiugda sa depensa nga kinahanglan pa nga moagi sa ‘cross-examination’ ang maong mga saksi, diin ang kampo sa depensa adunay higayon nga mangutana kanila aron masusi ang katukma ug katuohan sa ilang mga pahayag.
Sa usa ka pampublikong dokumento nga adunay mga bahin nga gitago ug gipetsahan Oktubre 26, mihangyo ang depensa sa ICC Trial Chamber III nga isalikway ang mosyon sa prosekusyon nga dawaton ang mga naunang narekord nga testimonya sa mga saksi nga giila pinaagi sa mga kodigo nga P-1393 ug P-1416.
Hinuon, wala mosupak ang depensa sa pagdawat sa testimonya sa ikatulong saksi nga giila isip P-1370.
Matod sa depensa, ang mga testimonya nila P-1393 ug P-1416 may kalabotan sa mga hinungdanon ug gilalisang isyu sa kaso.
Tungod niini, nangatarongan ang depensa nga gikinahanglan ang hugot nga pagsusi ug ‘cross-examination’ aron matimbang-timbang ang pagka-kasaligan sa mga pahayag sa maong mga saksi.
Sa laing bahin, mihangyo ang prosekusyon nga dawaton ang mga naunang narekord nga testimonya sa tulo ka saksi subay sa Rule 68(2)(b) sa ‘Rules of Procedure and Evidence’ sa ICC.
Ubos niini nga lagda, mahimong dawaton ang naunang narekord nga testimonya sa usa ka saksi kon matuman ang piho nga mga kondisyon, bisan pa kon dili siya personal nga motestigo sa korte.
