Nagtinguha ang Pilipinas ug Japan nga mas mapalig-on ang kooperasyon sa depensa ug seguridad sa rehiyon sa Southeast Asia, ilabina sa pag-atubang sa nagkagrabeng mga kalamidad, tensiyon sa kadagatan, ug mga kausaban sa kahimtang sa seguridad sa Indo-Pacific region.
Kini ang gipasiugda atol sa opening remarks ni Philippine Defense Secretary Gilberto C. Teodoro Jr. ug Japanese Defense Minister Koizumi Shinjiro sa ASEAN Plus One Defense Ministers’ Informal Meeting with Japan, nga gipahigayon sa Pilipinas isip kabahin sa pagpangulo niini sa ASEAN karong tuiga.
Matod ni Teodoro, dako ang papel sa Japan isip dugay nang kauban sa Pilipinas ug sa ubang miyembro sa ASEAN sa pagpalambo sa kalinaw, kauswagan, ug kalig-on sa rehiyon.
Gipasiugda usab niya nga mas gikinahanglan ang hiniusang paningkamot tali sa mga nasud tungod sa mga hagit sa East China Sea ug South China Sea, nga adunay dakong epekto sa kalinaw ug seguridad sa Southeast Asia ug sa mas lapad nga Indo-Pacific region.
Gipasalamatan ni Teodoro ang padayong suporta sa Japan sa panaghiusa ug sentral nga papel sa ASEAN, lakip na ang mga programa sa pagpalig-on sa kapasidad sa depensa ug maritime security.
Gihisgotan usab niya ang kooperasyon sa Pilipinas ug Japan isip co-chairs sa ASEAN Defence Ministers’ Meeting-Plus Working Group on Maritime Security alang sa 2024 hangtod 2027.
Matod ni Teodoro, ang mga hiniusang kalihokan ug Future Leaders Program nakatabang sa pagpalig-on sa maritime security, disaster resilience, ug relasyon tali sa mga tawo sa nagkalain-laing nasud.
