Giklasipikar sa Police Regional Office 7 o PRO-7 isip high-risk ang 363 ka sementeryo sa tibuok Central Visayas tungod sa gilaomang pagdagsa sa mga tawo atol sa paghinumdom sa Kalag-Kalag 2026.
Matod ni PLTCOL Rolan L. Aliser, spokesperson sa PRO-7, gilauman nga mas modaghan ang mga mobisita sa mga sementeryo karong tuiga tungod kay naatol sa weekend ang maong paghandum sa kalag-kalag.
Base sa rekord sa kapulisan, mokabat sa 992,618 ka tawo ang mibisita sa mga sementeryo sa rehiyon niadtong miaging tuig.
Tungod niini, giandam na sa PRO-7 ang pagdeploy sa mga personnel aron masiguro ang kahapsay ug kalinaw sa mga sementeryo ug sa ubang lugar nga gilauman nga daghan og tawo.
Matag sementeryo butangan og police assistance desk aron adunay maduolan ang publiko kon manginahanglan og tabang o impormasyon.
Dugang niini, mokabat sa 2,914 ka personnel ang igahin alang sa police assistance desk ug motorists assistance desk.
Motabang usab sa operasyon ang 1,702 ka personnel gikan sa Philippine Army, Philippine Coast Guard ug Bureau of Fire Protection, lakip ang 5,491 ka force multipliers nga gilangkoban sa mga barangay tanod, non-government organizations ug Disaster Risk Reduction and Management Office o DRRMO personnel.
Samtang, matod sa PRO-7, wala pay lugar sa Central Visayas nga giila nga critical area alang sa maong mga petsa.
Magsugod ang deployment sa mga personnel sa Oktubre 31 ug magpadayon hangtod Nobyembre 3.
Gipasalig sa kapulisan nga adunay mga personnel nga mabutang sa mga sementeryo, terminal, pantalan ug kadalanan aron matabangan ang mga biyahero ug masiguro ang ilang kaluwasan atol sa Kalag-Kalag 2026.
