Gipasalig ni President Ferdinand R. Marcos Jr. nga mahuman ang programa sa pag-apod-apod sa yuta ubos sa agrarian reform sa dili pa matapos ang iyang termino sa 2028, aron masiguro nga ang mga mag-uuma makabaton og legal nga pagpanag-iya sa mga yutang ilang giuma.
Atol sa iyang pagbisita sa Jaro, Leyte, kauban si Agrarian Reform Secretary Conrado Estrella III, personal nga nangulo ang Presidente sa pag-apod-apod sa 536 ka electronic land titles ngadto sa 508 ka benepisyaryo gikan sa nagkalain-laing probinsya sa Leyte ug Samar.
Matod ni DAR-8 Director Atty. Robert Anthony Yu, giisyu ang maong mga titulo ubos sa Support to Parcelization of Lands for Individual Titling (SPLIT) Project sa Department of Agrarian Reform (DAR). Naglangkob kini sa kinatibuk-ang 670.5 ka ektarya nga yutang pang-agrikultura.
Gipasiugda usab sa Presidente ang kasaysayan sa programa sa repormang agraryo, nga gisugdan panahon sa administrasyon sa iyang amahan nga si kanhi Presidente Ferdinand E. Marcos Sr., uban sa kanhi Agrarian Reform Secretary Conrado Estrella.
