Gipaspasan sa National Food Authority (NFA) ang proseso sa pagtipig sa bugas pinaagi sa pagbalhin gikan sa paggamit og 50-kilogram nga mga sako ngadto sa one-tonner bags o mga sako nga adunay kapasidad nga usa ka tonelada.
Gisulayan ang bag-ong sistema niadtong Oktubre 2025 sa mga sanga sa NFA sa Nueva Ecija, Occidental Mindoro, ug Davao del Sur isip kabahin sa pilot testing.
Sumala kang NFA Administrator Larry R. Lacson, mikunhod og 75 porsiyento ang oras sa pagtrabaho, samtang natunga ang gasto pinaagi sa paggamit sa dagkong mga sako ug forklift.
Matod ni Agriculture Secretary Francisco P. Tiu Laurel Jr., ang natipig nga gasto mahimong magamit sa pagpalit og dugang nga bugas gikan sa mga lokal nga mag-uuma.
Gibutyag usab sa NFA nga kinahanglan pang usbon ang mga giya sa pagkontrol sa peste ug fumigation sa dili pa ipatuman ang bag-ong sistema sa tanang pasilidad niini.
