CEBU CITY- Mikunhod ang ihap sa mga pasyenteng natabangan sa Philippine Red Cross (PRC) – Cebu Chapter sa nagkadaiyang sementeryo sa Sugbo atol sa Kalag-kalag 2026, ilabina sa mga dagkong sementeryo sama sa Carreta ug Calamba Cemetery.
Sa pakighinabi sa Bombo Newsteam kang Mohammad Janisa Manalao, PRC-Cebu Chapter Representative for Disaster Management and Emergency Medical Services, iyang gipadayag nga mas malinawon ug hapsay ang sitwasyon karong tuiga kon itandi sa miaging mga tuig.
Sumala kaniya, mikabat lamang sa 23 ka indibidwal ang ilang natabangan sa Cebu, diin kadaghanan niini nanginahanglan lamang og blood pressure (BP) consultation, dili sama sa miaging mga tuig nga adunay mga kaso sa heat exhaustion ug mga samad.
Aduna usab silay natabangan nga usa ka pasyenteng natumba ug naangol ang tiil sa Carreta Cemetery.
Dugang pa, usa lamang ka pasyente ang ilang gihatod sa ospital tungod sa sakit nga may kalabotan sa kainit ug posibleng stroke. Aduna usab silay natabangan nga kaso sa vaginal bleeding nga adunay kasaysayan sa myoma.
Sa kinatibuk-an, nakapokus ang PRC-Cebu sa pagmonitor sa mga sementeryo ug pantalan, diin kapin sa 50 ka personnel ang ilang gipakatap sa maong mga lugar.
Usa sa mga hinungdan sa pagkunhod sa mga pasyente, sumala kang Manalao, mao ang pagsunod sa publiko sa mga pahimangno sa mga awtoridad, ilabina ang paglikay sa pagbisita sa mga sementeryo panahon sa udto o sa grabeng kainit sa adlaw.
Gipasalamatan usab sa PRC-Cebu ang mga uniformed personnel, lakip ang Bureau of Fire Protection (BFP), Philippine National Police (PNP), mga barangay responder, ug uban pang ahensya nga nagtinabangay aron masiguro ang kaluwasan sa publiko atol sa Kalag-kalag.
