Gipahigayun sa United Tino Survivor for Justice and Reform (UTSJR) ang usa ka commemoration rally sa Cot-Cot Bridge sa Compostela Cebu, kagahapon adlaw nga Martes, Nobyembre 3, 2026.
Kini nga kalihukan gipahigayon alang sa paghinumdom sa labing unang anibersaryo sa Bagyong Tino niadtong November 4, 2025 nga mikalas sa gatusan ka mga indibidwal sa lungsod sa Liloan, Compostela ug Dakbayan sa Danao.
Gipangunahan ang programa sa unang misa nga gipangulohan ni Fr. Ciano Ubod, ug gisundan kini sa peaceful rally pasado alas 4:30 sa hapon, pinaagi sa paghulog ug mga buwak sa mga Tino survivors isip paghandom sa mga minahal sa kinabuhing nakalas sa Bagyong Tino sa milabayng tuig sa Cotcot River, Compostela Cebu.
Lakip usab ang pagpalupad sa mga puti nga balloon nga may nakasuwat nga “Justice for the victims of Tino, alang sa panawagan og hustisya sa mga nakalas ug pagpanubag sa mga hingtungdang indibidwal.
Muabot sa 19 ka mga kabanay ang mihatag ug testimonya atoll sa commemoration rally alang sa paghinumdum sa mga nakalas.
Sa pikas bahin gibutyag ni Ainjeliz Dela Torre-Orong, ang Public Information Officer sa Cebu Provincial Government nga gikasubo gihapon sa kagamhanan ang nahitabo sa pipila ka mga lugar sa Sugbo sa nakalabay nga Bagyo, hilabi na sa mga namatayan.
Matud niini, nahatag na ang tanan nga mga hinabang alang sa mga nabiktima ngadto sa mga nagkadaiyang Local Government Units, apan adunay pipila pa ka mga proyekto ang padayun pa sa pagproseso hilabi na sa mga pag-paayu sa mga taytayan ug mga dalan nga labing naapektuhan.
Nangayu usab og dispensa ang kagamhanan sa mga lugar nga nalangan ang proyekto ug hinabang gumikan kay nagsunod-sunod ang kalamidad sa 2025 diin nahitabo usab ang 6.9 magnitude earthquake.
