Gikumpirmar sa Philippine National Police nga adunay sila nakitang posibleng insidente sa sexual abuse ug exploitation ngadto sa mga bata ug kababaye-an atol sa ilang insiyal nga pakisusi didto sa ebidensiya nga gi-sumiter ni Thomas Markle Jr. batok sa iyang kaugalingong amahan, ug nabantog usab nga estranged father ni Meghan, Duchess of Sussex nga si Thomas Markle Sr. karong adlawa, Nobyembre 3, 2026.
Matud ni PMGEN Wilson Asueta, Acting Director for Investigation and Detective Management sa Philippine National Police, mibutyag nga atol sa insiyal nga pagpakasusi sa awtoridad ngadto na sa sulod niining gadgets ni Thomas Markle Jr. nga nadawat sa Inter-Agency Against Child Abuse and Exploitation niadtong Oktubre 23, 2026, nakita nila didto ang mga giingung photos ug videos diin giisip nga Online Sexual Abuse and Exploitation Materials (OSAEM).
Sigon pa ni Asueta, ang maong OSAEM nagpakita ug mga babaye, lalaki, ug gituohang mga menor de edad nga nag-engage ug sexual activity ug posibleng child abuse, apan padayon pa ang imbestigasyon ug evaluation sa kapulisan niini lakip na ang pag-ila sa identity sa mga nakita nga mga personalidad sa mga videos ug photos, diin gihulagway sa maong opisyal nga adunay mga Asian ug Caucasian, ug mga Filipino nga nalambigit.
Apan, dili pa mokomento ang kapulisan kung naapil ba si Markle Sr. sa mga giingong photos ug video nga gikonsiderar sa awtoridad nga online sexual abuse and exploitation materials.
Dugang pa, nagpadayon ang pagpakisusi sa Regional Anti-Cybercrime Unit 7 ngadto sa mga ebidensiya nga human kini makakuha ug cyber warrant aron sa pagpahigayon ug digital forensic examination alang sa mga ebidensiya nga naglangkob sa 9 mobile phones, 3 SD Card, 5 hard drive, 1 camera ug other non digital evidences lakip na ang ownership sa mga gadgets nga gisumiter ni Markle Jr. ngadto sa kapulisan isip ebidensiya, hilabi na kung kini tanan gipanag-iya ni ba ni Thomas Markle Sr. ug kung kanus-a ug asa kini nahimo.
Subay niini, gikabutyag ni Asueta nga nag-umol ang Philippine National Police ug joint taskforce naglangkob sa PNP Women and Children’s Protection Center, Criminal Investigation and Detection Group, Anti-Cybercrime Group, Intelligence Group, ug sa Police Regional Office-7 alang sa pag-imbestigar sa maong kaso.
Niining tungura ang PNP lamang ang kasamtangang nag-imbestigar sa maong kaso ug wala niapil sa pagpakisusi ang NBI o ang uban pang mga law enforcement agencies gikan sa national ug sa gawas sa nasud.
Kung ma-establisar ug mahan-ay ang mga facts sa kaso, gipanglantawan nga magpasaka ug mga tukmang kaso ang kapulisan batok kang Markle Sr. bisan pa ug nakagawas na kini sa Pilipinas, ug sa mga kaubanan niini.
Gipasalig sa Philippine National Police ngadto sa publiko nga mamahimong patas ug seryoso ang imbestigasyon sa maong kaso.
Sa kasamtangan, nakagawas si Markle Sr. sa Pilipinas niadtong Mayo 2026 human sa 4 ka buwan nga pagpuyo sa Sugbo ug niining tungura, gikataho nga gipasulod siya sa usa ka facility sa didto sa Amerika
