Nasikop sa kapulisan ang usa ka 36 anyos nga lalaking Chinese National human kini masakpi nga namalit ug 18 ka mga luxury branded items ginamit ang kinawat nga credit card details gikan sa usa ka abogadong pinoy didto sa NuStar mall sa may South Road Properties, Brgy.
Mambaling, Cebu City pasado alas 2:30 sa hapon kagahapong adlawa, Nobyembre 2 2026.
Ang suspek mao si “Cao”, 36 anyos, gikan sa Hubei sheng, Wuhan, China apan temporaryong nanimuyo sa usa hotel sa Banilad, Cebu City
Base sa initial nga imbestigasyon sa Mambaling Police Station, gidakop si “Cao” sa mga security officers sa NuStar Mall pinaagi sa citizen’s arrest pasado alas 2:30 sa hapon human gialarmahan ang maong suspek nga nakahimo ug upat ka fraudulent transaction human giingong mipalit ug 18 nga Louis Vuitton items nga nibalor ug PHP 2,704,700.00 ginamit ang credit card details gikan sa Apple Pay, nga gipanag-iya sa usa ka abogado gikan sa Metro Manila nga si “Ric”
Matud pa, nagpakarong-ingon ang suspek nga migamit sa identity ug authority sa abogadong biktima hinungdan sa pagkadakop sa suspek.
Gi-turnover sa Mambaling Police Station ang suspek inubanan sa nagdakop nga mga security officers sa maong mall ug sa mga witness nga representative sa Louis Vuitton Shop.
Gikatakda nga pasakaan ug kasong Theft in relation to RA 10175 o Cybercrime Prevention Act ang maong Chinese National
