Naluwas ang 19 ka mga tawo gikan sa Siyudad sa Sugbo ug Siyudad sa Mandaue, human nalunod ang pump boat nga ilang gisakyan sa kadagatan duol sa Isla sa Olango ug Punta Engaño sayo sa buntag niadtong Martes, Nobyembre 3.
Ang mga biktima, nga sagad managkabanay, bag-o lang gikan mibisita sa sementeryo alang sa Adlaw sa mga Kalag ug pauli na unta sa dihang naguba ang makina sa pump boat.
Samtang naglutaw-lutaw sila sa kadagatan, dali hinoun silang naluwas sa Edgel Express-5, uban ang tabang gikan sa Philippine Coast Guard. ug gidala dayon ngadto sa Hilton Wharf sa Punta Engaño.
Miatiman ang mga sakop sa Lapu-Lapu City Rescue sa 19 ka naluwas, nga naglakip sa tulo ka mga bata, usa ka tigulang, ug 15 ka mga hamtong.
Gidala ang mga biktima ngadto sa opisina sa Lapu-Lapu City Rescue alang sa medikal nga pagpakigsusi.
Gihatagan usab sila og mga tualya, pagkaon, gatas, ug kape una pa sila gihatod pauli sa ilang tagsa-tagsa ka mga pinuy-anan sa Pasil, Siyudad sa Sugbo, ug Poblacion, Siyudad sa Mandaue.
Samtang, ang Philippine Coast Guard–Lapu-Lapu City Station nagpahigayon og imbestigasyon bahin sa insidente.
