Nagsumite og resignation si Spain Transport Minister Óscar Puente unom ka adlaw human sa makalilisang nga pagbangga sa duha ka high-speed nga tren sa lungsod sa Urda, nga miresulta sa kamatayon sa labing menos 69 ka tawo ug pagkaangol sa daghan pang uban.
Gipahibalo ni Puente ang iyang desisyon atubangan sa Kongreso, diin iyang gipasiugda nga dili na angay nga magpabilin pa siya sa iyang katungdanan human mahitabo ang duha ka dagkong aksidente sa tren sulod lamang sa usa ka tuig.
Nahitabo ang trahedya niadtong Oktubre 28, dihang nabangga sa usa ka tren sa Renfe ang luyo sa tren sa Iryo.
Lakip sa mga giimbestigahang posibleng hinungdan sa aksidente ang depekto sa automatic signalling system ug posibleng sayop sa komunikasyon sulod sa control center.
Gawas sa pagbiya sa iyang katungdanan isip transport minister, gibawi usab ni Puente ang iyang kandidatura alang sa umaabot nga snap general election nga gikatakda sa Nobyembre 29.
Nahitabo kini taliwala sa nagkadaghang panawagan gikan sa oposisyon alang sa pagpanubag sa maong trahedya.
Gidayeg usab ni Prime Minister Pedro Sánchez ang desisyon ni Puente, ug gipasiugda nga boluntaryo kining gihimo sa opisyal isip pagpakita sa iyang pagbati sa responsibilidad ug pagtahod sa mga biktima ug ilang mga pamilya.
