Human sa taas nga proseso nga milungtad og lima ka tuig, opisyal nang nahimong legal nga mga anak ni basketball player Bobby Ray Parks Jr. ang mga anak sa iyang asawa nga si Zeinab Harake nga sila si Lucas ug Zebbiana.
Gipaambit sa magtiayon ang mahinungdanong kalampusan alang sa ilang pamilya diin ilang gidokumento ang pagkahuman sa legal nga proseso sa pagsagop (adoption) pinaagi sa National Authority for Child Care (NACC).
Matod ni Zeinab, usa sa iyang pinakadakong pangandoy mao ang pagkabaton og birth certificates diin parehas na ang ilang apelyido sa iyang mga anak.
Matuman na kini human opisyal nga maapil sa pamilya Parks ang duha ka bata.
Gisugdan na ni Zeinab ang proseso sa pagsagop kang Lucas sa dihang 22 anyos pa siya.
Apan wala kini mapadayon niadtong panahona tungod kay wala pa niya maabot ang 25-anyos nga minimum age requirement alang sa mga gustong mahimong adoptive parent.
Sa wala pa ang ilang kasal niadtong Hunyo 2025, gipadayon sa magtiayon ang legal nga proseso alang kang Lucas ug Zebbiana.
Lakip sa mga kinahanglanon ang home visits sa mga social worker, psychological ug medical assessments, ug uban pang dokumentasyon.
Gipaambit usab ni Ray ang iyang gibati isip amahan, nga bisan dili niya biyolohikal nga mga anak sila Lucas ug Zebbiana, giisip na niya silang kaugalingong pamilya sukad sa unang higayon nga iyang nahimamat ang mga bata.
Alang kang Zeinab ug Ray, labaw pa sa pagkaparehas sa apelyido ang ilang nakab-ot, kondili ang dugang nga kasigurohan ug lig-on nga pundasyon sa ilang pamilya.
