Nagtingkagol sa prisohan ang 27-anyos nga lalaki human kini nadakpan sa kapolisan tungod sa pagpangawat og usa ka mahalon nga pickleball paddle nga nagkantidad og P8,500 gikan sa usa ka tindahan sa Maria Clara Street, Barangay Cogon, Tagbilaran City.
Sa pakighinabi sa Bombo Newsteam kang PMaj Joseph Lopena, PNP Bohol Spokesperson gisaysay niini ang nahitabong pagpangawat ug gikumpirmar ang ilhanan sa suspetsado nga si Arnulto Patenio Reglamos, residente sa V.P. Avenue, Barangay Poblacion 1 sa maong dakbayan.
Basi sa imbestigasyon, misulod si Reglamos sa Soulmate Kick’s Bohol Store pasado alas 6:00 sa gabii ug nagpakaaron-ingnon nga nagtan-aw-tan-aw sa mga baligya.
Sumala sa empleyado nga si Joanna Cris Caintoy Podelino, 23-anyos, milanat og kapin sa usa ka oras ang suspetsado sa sulod una niini gitago ang maong paddle sa iyang sinina sa may tiyan ug daling nilakaw nga walay bayad.
Dali nga nailhan ang suspetsado human gireport ug gisubay sa mga awtoridad ang kuha sa CCTV camera.
Sa pagkakaron, napasaka na kasong theft and robbery Section (TRS) ubos sa pagpangu nila ni PLt. Joey Bicoy ug PMSg Magtabog ang pag-andam sa pormal nga kasong pagpangawat batok kang Reglamos ug ang posibleng pagbawi sa maong gikawat nga gamit. via Bombo George Lastimosa
