Gipusil-patay ang Usa ka 40-anyos nga inahan sa usa ka lalaking nagsakay og motorsiklo diha sa V. Rama Avenue sa Barangay Calamba, Siyudad sa Sugbo, pasado alas 11 sa buntag niadtong Martes, Nobyembre 10.
Giila ang biktima nga si Marjorie Llaguno, usa ka residente sa Caballes Compound, Barangay Guadalupe, ug adunay 5-ka mag anak.
Base sa CCTV footage nga gisusi sa Sawang Calero Police Station, ang biktima bag-o lang nanaog gikan sa usa ka pampublikong sakyanan gikan sa Guadalupe dihang miduol ang duha ka lalaki nga nagsakay og motorsiklo, ug ang drayber sa motorsiklo gituohang maoy namusil, ug dayong misibat ang mga suspek paingon sa Natalio Bacalso Avenue.
Matud sa mga kabanay sa biktima, nga posibleng adunay kalabotan niini ang kanhi kapikas, gumikan kay sa wala pa mahitabo ang krimen, daan nang gihulga ang biktima kung dili makigbalik ngadto sa kanhi karelasyon niini.
Ang biktima gikatahong adunay lima ka mga anak ug kaniadto adunay relasyon sa usa ka security guard nga giingong naghulga kaniya.
Sa pagkakaron, padayon pa ang imbestigasyon sa mga sakop kapulisan, diin gisusi nila ang mga CCTV footage gikan sa mga kamera sa palibot ug nakig-alayon sa pamilya sa biktima aron masuta ang mga detalye mahitungod sa pagpatay.
