Patay ang unom ka tawo, lakip ang usa ka surgeon ug usa ka 13-anyos nga batang lalaki, human giatake sa airstrike sa Israel ang Nasser Hospital sa Khan Younis, habagatang bahin sa Gaza, Huwebes, Nobyembre 12.
Sumala sa Gaza Health Ministry, dili moubos sa 28 ka tawo ang naangol sa maong pag-atake, lakip ang mga pasyente ug medical personnel.
Grabe ang kadaot ang nahiagoman sa surgical wing sa ospital, lakip ang mga operating room ug mga pasilidad medikal.
Tungod niini, napugos ang ospital sa pagsuspenso sa pipila ka serbisyo, lakip ang operasyon, radiology ug laboratory services.
Gipahayag sa militar sa Israel nga ang ilang operasyon gitumong batok sa usa ka kumander sa Hamas ug uban pang mga militante nga giingong anaa sulod sa hospital complex.
Hinuon, wala maapil sa mga namatay ang maong kumander ug wala usab magpagawas ang militar og ebidensiya sa ilang alegasyon.
Nagpabiling dakong kabalaka ang kaluwasan sa mga pasyente ug mga trabahante sa panglawas, ilabi na kay ang Nasser Hospital usa sa pipila na lamang ka dagkong pasilidad medikal nga naglihok sa Gaza.
