Gipasabot sa Bureau of Immigration (BI) ang pagbutang og mga espesyal nga lane alang sa Association of Southeast Asian Nations (ASEAN) diha sa mga nag-unang tugpahanan sa nasod.
Matod sa tigpamaba sa BI nga si Anisha Hadji Hassan, gituyo ang maong mga espesyal nga lane aron mapadali ang paglihok ug masiguro ang hapsay ug epektibo nga pagproseso sa mga delegado nga motambong sa ASEAN Summit.
Gihimo usab kini aron malikayan ang bisan unsang pagkalangan o pagkabalda sa pagproseso sa mga regular nga pasahero atol sa maong kalihokan.
Gilauman sa ahensya ang pagsaka sa gidaghanon sa mga pasahero samtang nagkaduol ang mga petsa nga Nobyembre 15 hangtod 17, hinungdan nga gikinahanglan ang pagpatuman sa mga espesipikong kahikayan sa operasyon.
Tungod niini, gipatuman na sa Bureau of Immigration ang mas taas nga lebel sa alerto sa mga tugpahanan sukad pa kagahapon.
