-- ADVERTISEMENT --

Gihamtangan sa kapulisan sa Paris, France og lima nga adlaw nga protest ban sa pipila ka mga high school ug unibersidad sa kaulohan, taliwala sa nagpadayon ug kaylap nga mga demonstrasyon sa tibuok nasod.

Gidili sa mga awtoridad ang bisan unsang matang sa protesta sulod sa 100 meter-radius gikan sa 10 ka high school ug lima ka unibersidad, nga epektibo gikan sa Nobyembre 16 hangtod sa Nobyembre 20.

Matod ni Paris police chief Patrice Faure, gikinahanglan kini nga mga lakang tungod sa pagmugna og mga kagubot ug pagbutang og mga barikada palibot niining mga institusyon sa edukasyon, ingon man ang nagpadayon nga mga buhat sa kapintasan.

Samtang, walo ka mga mayor gikan sa nagkalain-laing distrito sa kaulohan ang nakig-alayon sa rehiyonal nga buhatan sa edukasyon aron mohangyo og seguridad alang sa mga eskwelahan nga gibarikadahan.

Niadtong miaging Sabado, 106,000 ka mga tawo ang nangadto sa kadalanan sa tibuok France aron moapil sa mga protesta. Kini ang ikalima nga sunod-sunod nga Sabado sa kaylap nga mga demonstrasyon sa nasod sukad niadtong Oktubre, nga gipalihok sa mga panawagan sa publiko alang sa mas maayong mga sumbanan sa edukasyon ug pagpalambo sa kahimtang sulod sa sistema sa edukasyon sa nasod.

-- ADVERTISEMENT --