-- ADVERTISEMENT --

Gikwestyon sa pipila ka Senator-judges ang kredibilidad ug bili sa mga pahayag nga gihatag sa usa ka saksi alang sa depensa ni Bise Presidente Sara Duterte atol sa mga pagdungog sa impeachment kagahapon, Miyerkules, Nobyembre 19.

Diretsong gipahayag ni Senator-judges Erwin Tulfo nga huyang ang mga saksi nga gipresentar sa kampo ni Bise Presidente Sara Duterte sa miaging pipila ka adlaw.

Giawhag ni Tulfo ang grupo sa depensa nga magpresentar og mga saksi nga adunay igong kahibalo ug kapasidad sa pagtubag sa mga mahinungdanong pangutana gikan sa mga Senator-judge.

Gipangutana usab nila Senator-judge Raffy Tulfo ug Risa Hontiveros kung giunsa pag-evaluate sa saksi nga si Atty. Rainer Dela Fuente ang forensic report nga giandam sa eksperto sa prosekusyon nga si Atty. Alexander Cabrera, ilabi na nga wala pa niya madawat ang maong report sa wala pa ang pagdungog. Giangkon ni Dela Fuente nga wala niya nabasa ang tibuok report, ug wala usab niya gisusi ang mga rekord sa pinansyal nga gigamit niini.

Matod ni Senator-judge Joel Villanueva, bisan pa man og makahatag ang saksi og mga pagpasabot mahitungod sa mga balaod batok sa money laundering ug mga pamaagi sa bangko, dili siya ang awtoridad nga adunay gahom sa pagtino sa kriminal nga tulubagon.

-- ADVERTISEMENT --

Bisan pa niini, nagpabilin ang baruganan ni Dela Fuente nga kaya niyang mohatag og mga tubag base sa mga probisyon sa balaod nga gipresentar atol sa pagdungog.