-- ADVERTISEMENT --

Gikuwestiyon ni Sen.-Judge Raffy Tulfo ang gilapdon sa kahibalo ug mga kwalipikasyon ni Atty. Rainer Dela Fuente, kinsa gipresentar isip saksi sa depensa sa impeachment trial batok kang Bise Presidente Sara Duterte.

Nahitabo kini human sa sunod-sunod nga mga pangutana gikan sa abogado sa depensa nga si Atty. Mark Vinluan, kinsa nangutana kang Dela Fuente mahitungod sa papel sa amici curiae—mga indibidwal nga naghatag og eksperto nga panglantaw ngadto sa korte mahitungod sa mga espesipikong hisgutanan.

Atol sa pagpangutana, gipadayag ni Tulfo ang iyang katingala kung giunsa pagpakita ni Dela Fuente nga kaya niyang hisgutan ang nagkalain-laing mga hilisgutan, lakip na ang mahitungod sa amici curiae, Korte Suprema, Office of the Ombudsman, ug ang Department of Justice (DOJ).

Dugang sa senador, dili siya kombinsido nga adunay igong kapasidad ang maong saksi sa pagtubag sa maong mga legal nga isyu sanglit dili kini sakop sa iyang teritoryo o espesyalisasyon. Gihulagway pa niya ang testimonya nga “makalaay” ug daw “nagbinoang” lamang sa hukmanan, hinungdan nga nihangyo siya sa Presiding Officer nga pugngan o limitahan ang linya sa pagpangutana.

Sa iyang bahin, niuyon si Presiding Officer Senate President Francis “Chiz” Escudero sa obserbasyon ni Tulfo. Gipaklaro ni Escudero nga ang mga batakang konsepto ug interpretasyon sa balaod ug Konstitusyon usa ka butang nga ang impeachment court mismo ang mohimo ug nakakuha na kini og judicial notice.

-- ADVERTISEMENT --

Gipasabot usab sa Presiding Officer nga ang maong saksi wala ipresentar ug wala ma-qualify isip usa ka constitutional expert, kondili nagpadayag lamang sa iyang kaugalingong opinyon isip usa ka abogado. Gumikan niini, gimandoan ni Escudero ang abogado sa depensa nga si Atty. Mark nga tapuson na ang maong linya sa pagpangutana o mobalhin na sa sunod niyang punto.