Mokabat sa P4,101,216 ang kantidad sa gituohang shabu nga nasakmit ug kapin sa 400 ka mga indibidwal ang nasikop sa Police Regional Office 7 (PRO-7) atol sa ilang sunod-sunod nga kampanya batok sa kriminalidad gikan Nobyembre 12 hangtod Nobyembre 17.
Basi sa taho ni Police Lieutenant Colonel Rolan Aliser, ang tigpamaba sa PRO-7, nakapahigayon ang kapulisan og kinatibuk-ang 378 ka mga operasyon sa tibuok rehiyon sulod sa lima ka adlaw, nga miresulta sa pagkasikop sa 445 ka mga suspek.
Sa kampanya batok sa ilegal nga drugas, nakatala ang PRO-7 og 144 ka operasyon diin 161 ka mga tawo ang nadakpan ug nasakmit ang 603 gramos nga shabu nga adunay Dangerous Drugs Board (DDB) value nga P4,101,216.
Sa pagpangita sa mga wanted persons, mipahigayon ang kapulisan og 96 ka operasyon nga miresulta sa pagkasikop sa 96 ka mga akusado—diin 23 niini ang giila nga most wanted persons ug 73 ang other wanted persons.
Samtang sa kampanya batok sa ilegal nga sugal, 66 ka operasyon ang gilusad nga nakasikop og 147 ka mga indibidwal ug nakakumpiska og P13,300 nga pusta.
Sa pikas bahin, sa kampanya batok sa dili lisensyadong armas (loose firearms), nakapahigayon ang PRO-7 og 72 ka operasyon diin 41 ka mga suspek ang nadakpan, samtang narekober ang 71 ka mga armas, usa ka eksplosibo, ug 97 ka mga bala.







