Gipalig-on sa Office of the Ombudsman ang unom ka bulan nga suspensyon nga walay sweldo batok kang Mayor Ronald Allan G. Cesante sa Dalaguete, Cebu, ug lima pa ka opisyal tungod sa grabeng pagpabaya sa katungdanan o Gross Neglect of Duty.
Nag-ugat kini sa mga iregularidad sa pagtukod og bodega sa munisipyo sa usa ka pribadong yuta.
Pinaagi sa usa ka “Consolidated Order,” gibasura sa Ombudsman ang “motion for reconsideration” nga gisang-at sa mga opisyal, ug gipadayon ang nauna niining desisyon nga gipagawas niadtong Agosto 29, 2025.
Lakip sa mga gisuspinde mao sila si Municipal Assessor Edmund M. Centeno, Budget Officer Brenda S. Vergara, ug tulo ka miyembro sa Bids and Awards Committee.
Matod sa Ombudsman, ang permiso nga gigamit sa mga opisyal dili igo aron hatagan og katungod ang munisipyo sa pagsulod sa maong yuta ug pagtukod og bodega niini. Napakyas usab sila sa pag-verify kung ang representante ba sa mga tag-iya sa yuta adunay legal nga awtoridad sa paghatag sa maong pagtugot.
Gipasiugda sa ahensya nga angay unta nga gisiguro una sa mga opisyal ang legalidad ug pagkakompleto sa mga dokumento sa dili pa ipadayon ang proseso sa pagkuha (procurement) ug pagtukod sa proyekto.










