Nag-isyu ang House Committee on Justice og subpoena sa abogado nga nag-notaryo sa affidavit ni Ramil Lagunoy Madriaga kalabot sa nagpadayon nga imbestigasyon sa impeachment complaint batok kang Bise Presidente Sara Duterte.
Pinaagi sa “subpoena ad testificandum et duces tecum,” gimandoan sa komite si Atty. Cynthia Viñas-Pantonal nga motambong sa hearing sa Abril 14, 2026.
Gawas sa pagtambong, kinahanglan usab nga isumiter sa abogado ang orihinal nga kopya sa affidavit ni Madriaga nga gipetsahan og Nobyembre 29, 2025.
Sumala sa komite, mahinungdanon ang testimonya ni Viñas-Pantonal aron mailhan ug mapamatud-an ang giingon nga dokumento nga anaa sa mga reklamo nga gisang-at batok sa Bise Presidente.
Ang giingon nga subpoena, nga gipetsahan og Marso 31, 2026, gi-isyu ubos sa awtoridad ni House Committee on Justice Chairperson Rep. Gerville “Jinky Bitrics” Luistro ug gipirmahan ni Speaker Faustino “Bojie” G. Dy III.
