Gibutyag ni Atty. Noemi Truya-Abarrientos, ang Deputy Executive Director sa Children’s Legal Bureau (CLB), ang iyang baruganan bahin sa kabalaka sa nagkadaghang insidente sa kapintasan nga gikalambigitan sa mga kabatan-onan.
Sumala sa iyang pahayag atol sa pakighinabi sa Bombo Radyo Cebu kaniya, kini usa ka makasubo ug makaalarma nga panghitabo tungod kay ang mga pagpakita sa kapintasan nga kaniadto kasagaran mabuhat lamang sa mga hamtong, o kaniadtong masaksihi sa ubang mga nasud sama sa mga school shootings sa Estados Unidos, karon nahitabo na dinhi sa nasud.
Gipahayag ni Atty. Truya-Abarrientos nga daghang nagkalain-laing sanga ang kinahanglang tan-awon kon ngano nga makaabot sa ingon niini nga aksyon ang usa ka bata.
Dugang pa niya, bisan pa sa mga posibilidad nga gihisgutan sa ubang opisyal sama sa impluwensya sa mga organisadong grupo o mga grupo gikan sa gawas sa nasud, kinahanglan pa gihapon kini nga ipailalom sa mas lalom nga imbestigasyon aron matino ang tunhay nga rason.
Gidugang niya, subay sa ilang pagtuon bahin sa mga children in conflict with the law (CICL), gipasabot niya nga giatubang sa mga bata ang gihiusa nga epekto sa “nature ug nurture.”
Bisan pa kon naay posibilidad sa predisposition sa genetics o DNA sa usa ka bata, mas dako ang papel sa ilang palibot, partikular na ang ilang exposure sa balay, komunidad, ug ang nadawat nga suporta gikan sa ilang pamilya.
Giklaro usab sa legal expert nga dili dayon pwedeng basolon ang mga video games o social media, tungod kay wala pay siguro kon mautro ba gyud ang batasan sa usa ka partikular nga bata tungod lang niini.
Busa, gihatagan niya og prayoridad ang pag-imbestigar sa pamilya ug sa access sa mga armas, ilabi na nga sa mga insidente sa Tacloban ug Zamboanga, nakita nga ang mga armas nga gigamit gikan sa pamilya o kabanay nga mga law enforcers.
Sa katapusan, gipahinumdoman ni Atty. Truya-Abarrientos ang publiko nga ang mga eskwelahan kinahanglang magpabilin nga “zones of peace” o luwas nga dapit alang sa mga kabataan. Nagpakita kini nga kinahanglang adunay mas strikto nga pagbansay, pagbantay, ug responsibilidad gikan sa mga law enforcement agencies ug pamilya aron masiguro nga walay access ang mga bata sa bisan unsang klase sa armas.
