Gipadayag ni Atty. Arvin Odron, Regional Director sa Commission on Human Rights (CHR) Region-7, nga nagpadala na og Quick Reaction Team ang ilang opisina sa CHR Region-9 aron magpahigayon og dinalian nga imbestigasyon bahin sa nahitabong shooting incident sa Zamboanga.
Sumala pa ni Odron, dakong kaguol ang maong insidente ilabi na nga usa ka menor de edad ug estudyante ang nalambigit, bisan pa man nga ang mga tunghaan gipanalipdan ug giisip nga “zone of peace”.
Gidugang usab ni Odron nga nakig-alayon na sila sa Philippine National Police (PNP) ug sa kapolisan sa Zamboanga City aron masuta ang matuod nga motibo sa suspek.
Tumong sa maong imbestigasyon mao ang pag-edukar ug paggiya sa mga ahensya sa pagpatuman sa balaod, ang nasudnong gobyerno, ug uban pang mga ahensya sa gobyerno kon unsaon pagsulbad sa mga posibleng isyu, sama sa mga mental health concerns, mga pressure sa eskwelahan, o uban pang mga panginahanglan sa mga bata aron malikayan ang pagbalik sa maong mga trahedya.
Gibutyag usab ni Atty. Odron nga ang ilang komisyon kanunay nga nakigtambayayong ug miapil sa mga inter-agency committee ug mga miting aron tun-an ug sulbaron ang mga importanteng isyu sa nagkalain-laing komunidad.
Gipasabot niya nga ang mga problema sa Rehiyon 7 mahimong lahi sa ubang mga rehiyon, labi na kadtong may kalabotan sa Children in Conflict with the Law (CICL), mga sektor nga nanginahanglan og proteksyon, ug ingon man ang isyu sa red-tagging.
Dugang pa ni Odron, subay sa palisiya sa komisyon human sa insidente sa Tacloban ug sa narekord nga mga miting uban sa ubang mga ahensya, usa sa mga nag-unang rekomendasyon sa CHR mao ang pagpalambo ug pagpalig-on sa seguridad sa sulod ug palibot sa mga eskwelahan.
Matud niya, gipakita sa mga bag-ong panghitabo nga adunay mga kakulangan o “lapses” sa seguridad nga kinahanglang hatagan ug dinalian nga pagtagad aron masiguro ang kaluwasan sa mga estudyante.
