Opisyal nga nilingkod si Sushila Karki sa katungdanan isip punong ministro sa Nepal kagahapong adlawa, Domingo, duha ka adlaw pagkahuman sa iyang pagkatudlo nga manguna sa interim nga gobyerno.
Si Karki, ang unang babaye nga premier sa nasud nga kanhi nagsilbi isip chief justice, nanumpa niadtong Biyernes ni Presidente Ramchandra Paudel isip tubag sa mga hangyo sa mga nagprotesta human sa pagpalagpot sa napili nga si KP Sharma Oli.
Gisugdan niya ang iyang opisyal nga mga katungdanan gikan sa bilding sa Home Ministry sa Singha Durbar, tungod kay ang opisina sa punong ministro gibalhin didto pagkahuman nasunog ang niaging bilding sa panahon sa mga protesta.
Lakip sa una niyang mga desisyon mao ang paghatag tabang sa mga biktima sa mga protesta sa niaging semana.
Samtang si Chief Secretary Eknarayan Aryal niingon nga giila sa gobyerno ang mga napatay sa kalihukang “Gen Z” isip mga martir, nga ang matag apektadong pamilya nakadawat ug pinansyal nga suporta, ug ang mga ospital gimanduan usab sa paghatag og libre nga medikal nga pagtambal sa mga nasamdan.
Labing menos 51 ka mga tawo ang namatay ug daghan pa ang nasamdan sa mga protesta sa masa karong semanaha nga gipahinabo sa pagdili sa mga platform sa social media. Ang mga protesta nahimong mas lapad nga kalihukan batok sa giingong korapsyon ug nepotismo sa mga elite sa politika, uban sa mga demonstrador nga nagpunting sa mga pinuy-anan, Korte Suprema, ug uban pang publikong mga bilding.
