CEBU CITY-Gisiguro sa Department of Education (DepEd) Regional Office VII nga magpabiling luwas ang mga magtutungha batok sa coronavirus disease (CoVid-19) og uban pa’ng hulga sa sakit subay sa pagtugot og balik sa national, regional ug mga off-campus activities sa mga tunghaan sugod karong Pebrero 24.
Matud ni DepEd Region VII Director Salustiano Jimenez sa dihang nahinabi sa Bombo Radyo Cebu nga ilang nadawat niadtong milabay’ng adlaw ang bag-ong DepEd Memo nga naglangkob sa Third Set of Policy Directives may labot sa CoVid-19.
Base sa bag-ong memo, gitugutan na ang tanang DepEd units sa pagpahigayon sa national, regional ug mga off-campus activities apan pabiling sundon ang mga precautionary measures nga una nang giplastar sa Department of Heath ug sa Department of Education.
Gani giawhag ni Director Jimenez ang mga ginikanan nga kung gidala ang ilang mga anak sa gawas sa nasud ilabi na sa mga lugar nga apektado sa Coronavirus, ipaubos gyud kini sa 14-day quarantine.
Hinuon dili ra markahan nga absent ang maong mga learners inay hatagan gihapon kini og modyul og ubang aktibidad nga himuon sa ilang panimalay.
