CEBU – Pipila ka mga adjustment ang ipatuman sa Cebu City Police Office alang sa umaabot nga mga holiday season.
Gipahibalo ni CCPO Director Police Colonel Ireneo Dalogdog, nga ilahang dugangan ang presensya sa kapulisan sa mga gitawag nga ‘place of convergence’ sama na lang sa mga kadalanan, mga mall ug mga simbahan.
Matud pa, ilahang gipangandaman ang pagsugod sa Simbang Gabi gumikan kay ilahang gilauman nga mudagsa ang mga tawo ilabi na nga gi-ablihan na ang mga simbahan human sa istrikto nga pagpatuman sa mga COVID-19 guidelines.
Sigon ni Col. Dalogdog nga lauman ang pagsaka sa mga mahitabong krimen panahon sa holiday season apan paningkamotan sa kapulisan nga mamintinar ang kahapsay ug kalinaw sa dakbayan sa Sugbo.
Mipahimangno na lang kini sa publiko nga kung mugawas sa panimalay kay mo adto ug mall o simbahan, giingong dili na lang magdala o magsul-ob ug mga mahalon nga butang diin mao’y target sa mga dautang elemento sama na lang sa mga tulisan, snatcher ug mangungu-ot.
Tambag sa police official nga kanunay nga magmatngon sa palibot sa umaabot nga mga holiday season.
