Sobra 100,000 ka mga partisipanti ang nakiglambigit sa gipahigayung “Trillion Peso March” niadtong adlawng Dominggo Septiyembre 21, 2025 nga gipahigayun sa EDSA “People Power Monument”.
Matud ni Akbayan Partylist Representative, Perci Cendaña atol sa eksklusibong pakighinabi sa Bombo Radyo Cebu News Team, nga ang gipahigayung lihok protesta sa mga nagkalaing-laing lugar sa nasud mahulagway nga usa ka hulga sa mga opisyal sa gobyerno nga mga nalambigit sa mga anomaliya ug korapsiyon.
Dugang ni Cendaña, nga kinahagnglang seryusohon sa mga opisyal ang mga imbestigasyon maylabut sa korapsiyon ug kinahanglang aduna gayu’y manubag sa krimen nga nahitabo.
Gihimug-atan usab ni Cendaña nga ang kalihokan mahitungod batok sa korapsiyon sa gobyerno, rason nga nakasabut kini sa gibati sa mga kauban niini nga kasagmuyo batok usab sa Duterte loyalist nga nagpahigayun ug laing lihok protesta diin gihulagway niini nga sukwahi sa mismong tumong sa protesta.
Nabalaka usab kini sa nahitabong mga bayolenting lihok protesta gumikan sa mga kadaot nga nahitabo apan gidugang niini nga importante nga ipadayag sa mas malinawon nga paagi ang lihok protesta bisan paman sa nagkalain-laing mga pagtuo.
Nanawagan usab si Cendaña, nga ipatigbabaaw gihapon ang tawhanong katungod ug magpahigayun ug imbestigasyon sa nahitabong kagubot sa lihok protesta.
