CEBU – Pagatutukan ni Talisay City Mayor Gerald Anthony “Samsam” Gullas ang traffic management sa dakbayan.
Gibutyag ni Mayor Gullas nga mas pahugtan sa iyahang administrasyon ang pagpatuman sa ‘traffic rules and regulation’.
Subay niini, tukurun ang Aksyon Agad Center kung diin mao kini ang mag-monitor, ingun man maghatag ug hinanali nga aksyon kalabut sa trapiko ingun man kabahin usab kini sa disaster preparedness.
Matud sa mayor nga gikinahanglan ang maong buhatan arun nga mag-monitor usab sa mga traffic violators ug gani plano nila nga patas-an ang penalty sa mga malapason.
Plano usab niini nga makigpulung sa iyahang legal team kung gikinahanglan pa ug ordinansa o mahimu kini nga magpagawas ug executive order sa pagpatuman ug helmet policy sa dakbayan sa Talisay ilabi na sa national roads.
Samtang, gihimug-atan ni Gullas nga magpadayun ang iyahang hugut nga pagsupurta sa Talisay PNP sa kampanya batuk iligal nga drugas, ingun man sa pakigbatuk sa kriminalidad.
Nagkanayun ang bag-ung mayor nga plano niini nga magpahigayun ug After Care Program sa war on drugs kung diin giingung mao ang gayud ang trabaho sa local government unit gumikan kay gitataw niini nga mandato sa kapulisan ang kahapsay ug kalinaw sa dakbayan.
