Malampuson ang debut ni Albert Ian Delos Santos sa senior continental stage human niya nakuha ang bronze medal sa men’s 70kg weightlifting event sa 2026 Asian Games nga gipahigayon sa Nagoya City Trade and Industry Center.
Ang 20-anyos nga Filipino weightlifter makauli nga dala dili lang ang medalya apan lakip na ang bag-ong junior world ug Asian record, human niya giisa ang 183kg sa clean and jerk atol sa iyang ikatulong pagsulay.
Diin nalabwan ni Delos Santos ang iyang kanhi junior world ug Asian record nga 180kg pinaagi sa pag-isa og 181kg sa iyang ikaduhang pagsulay. Sa iyang katapusang pagsulay, gipataas niya ang timbang ug malampusong giisa ang 183kg, nga nagbuak na usab sa iyang kaugalingong record.
Samtang sa snatch, nakatala si Delos Santos og 141kg, nga nagdala sa iyang kinatibuk-ang naalsa ngadto sa 324kg ug nakasiguro sa ikatulong pwesto sa podium.
Napildi niya si Adkhamjon Ergasev sa Uzbekistan, kinsa nahimutang sa ikaupat nga pwesto nga adunay kinatibuk-ang 318kg (142kg snatch ug 176kg clean and jerk).
Samtang, si Ri Wun Ju sa North Korea maoy nakakuha sa gold medal nga adunay kinatibuk-ang 349kg, nga gilangkuban sa 151kg snatch ug 198kg clean and jerk. Ang pambato sa host country nga si Masannori Miyamoto sa Japan maoy nakakuha sa ikaduhang pwesto nga adunay kinatibuk-ang 342kg.
Nakuha ni Delos Santos ang bronze medal sa iyang unang pag-apil sa Asian Games samtang dungan nga nagtakda og bag-ong junior world ug Asian record.
