Natapos na ang kampanya sa Filipina tennis star nga si Alex Eala sa Canada Open 2026 human siya mapildi sa kanhing Olympic champion ug World No. 12 nga si Belinda Bencic sa Switzerland, 6-4, 6-0, sa ilang Round of 16 showdown karung adlawa Lunes.
Maayo ang pagsugod ni Eala, nga nakakuha og upat ka sunod-sunod nga puntos aron manguna, 1-0.
Apan dali siyang gitubag ni Bencic og upat ka sunod-sunod nga puntos ug mi-break aron manguna, 2-1.
Nakabawi si Eala pinaagi sa break aron makatabla, 2-2, apan mibalik dayon si Bencic sa pagdominar ug mi-break pag-usab aron manguna, 3-2.
Gipalapdan sa Swiss veteran ang iyang labaw ngadto sa 4-2 pinaagi sa lig-on nga serve.
Nakabawi pa si Eala aron makatabla sa 4-4, apan nakadaog si Bencic sa sunod nga duha ka game aron selyohan ang unang set, 6-4.
Sa pag-abot sa ikaduhang set, nahimo nga one-sided diin dali nga mipatigbabaw si Bencic ug midaug sa sunod-sunod nga lima ka game aron manguna, 5-0, sa wala pa tapuson ang duwa sa 6-0.
Natapos ang kampanya sa 21-anyos nga Eala sa Toronto usa ka semana human niya nasakmit ang iyang unang WTA title sa Washington.
Sunod nga adtoan ni Eala ang Cincinnati alang sa laing WTA 1000 tournament, sa dili pa ang US Open.
