METRO MANILA-Gikompirmar mismo ni Alice Guo nga nakadawat siya og hulga sa iyang kinabuhi ug nangayo siya og tabang kang Department of Interior and Local Government (DILG) Sec. Benhur Abalos Jr. ug Philippine National Police (PNP) Chief PGen. Rommel Fracisco Marbil.
Mismo si Guo ang miangkon niini sa iyang pag-uli sa Pilipinas gikan sa Jakarta Indonesia kaganinang ala una sa buntag.
Matod ni Guo, nangayo siyag tabang nila ni Abalos ug Marbil tungod kay gibati niya nga luwas sa PNP ug DILG.
“Kino-confirm ko po ang lahat po ng sinabi ni Secretary na mayroon po akong death threat at humingi po ako ng tulong sa kanila at masaya din po ako na makita sila.”
Nunot niini, giangkon usab ni Abalos nga nangayo og pipila ka minuto si Guo nga makig-estorya kang PNP Chief Marbil niadtong didto pa sila sa Indonesia.
Wala usab gidetalye ni Guo kon unsa nga hulga ang iyang nadawat, apan ilang gitambagan ang kanhi mayor nga dili mahadlok ug ibutyag ang mga dagkong tawo nga nagpaluyo niini dungan sa ilang pagsaad nga panalipdan ang kinabuhi sa gitaktak nga mayor.
Kahinumduman nga kagahapon, Septiyembre 5, atol sa pag-turn over ni Alice Guo sa mga awtoridad sa Indonesia ngadto sa pipila ka opisyal sa kagamhanan sa Pilipinas, samtang live online, nasagap siya sa mic. ni DILG Sec. ang pagpangayo pg tabang ni Guo.
