Nitanyag og proposal ang lungsod sa Aloguinsan sa Kagamhanang Dakbayan sa Mandaue sa posibilidad nga ilabay sa ilang lungsod ang basura gikan sa syudad.
Kini ang tampo sa panagpulong ni Aloguinsan Municipal Mayor Caesar Ignatius “Ig-ig” Moreno ngadto kang Mandaue City Mayor Thadeo “Jonkie” Ouano atol sa courtesy visit niini sa Mandaue City Hall.
Sumala pa ni Mayor Moreno nga sa ilang panaghinabi ni Mayor Ouano nga adunay posibilidad nga makalabay ang dakbayan sa ilang basura ngadto sa lungsod sa Aloguinsan sa kasadpang Sugbo.
Isip tubag ni Mayor Ouano, nipadangat kini og pagtuon sa maong proposal nga mamahimong pro-people ug pro-environment ang paglabay sa basura samtang nagpangita pa kini og alternatibo human sa insidenteng nahitabo sa Binalaw, Cebu City niadtong Enero 8 nga nakapahunong ug nakabalda sa naandang garbage landfill sa dakong bahin sa Metro Cebu lakip ang dakbayan sa Mandaue.
Sa pagkakaron, ang Mandaue kay aduna lay temporaryong dam-okanan sa basura didto sa Barangay Umapad sa hinaot nga makakita og mas malungtarong solusyon ang kagamhanang dakbayan sa suliran sa inadlaw-adlaw nga problema sa basurang mamugna sa mga lungsuranon niini.
