CEBU CITY — Nag-atubang ug kasong frustrated murder to parricide ang usa ka amahan nga nakapatay sa iyang anak samtang ni-angol sa iyang stepdaughter sa Brgy Estaca, lungsod sa Pilar, Bohol.
Giila sa Pilar Police Station pina-agi sa hepe nga si Police Executive Master Sergeant Rogelio Baluran ang suspek nga si Rufino Ybañez.
Segon ni Baluran nga Nobyembre 6 ning kasamtangang tuig nahitabo ang krimen diin lango matod pa sa ilimnong makahubog ang akusado ug gipang-habas ang mga bata nga nangatulog na niadtong higayuna.
Nisuway pa unta matod pa sa pag-pacify ang inahan sa mga bata apan wala kini nahimo.
Na-igo ang tiyan sa tres anyos nga anak mismo sa suspek atol sa paghabas niini samtang naputlan usa sa mga kamot ang 13-anyos nga stepdaughter.
Human sa maong panghitabo, nagdunggab pa sa iyang kaugalingon ang suspek.
Dali nga na-report sa otoridad ang maong panghitabo hinungdan nga dali nga nadala sa balay tambalanan sa Tagbilaran ang mga bata lakip na ang suspek apan nakabsan sa kinabuhi ang tres anyos.
Subay niini na-hospital arrest ang suspek kinsa sa pagsusi sa kapulisan sa background niini kanhi kini nagpuyo sa Trinidad Bohol ug kanhi matod pa kini drug surrenderee.
Hugot nga gimonitor sa otoridad ang suspek samtang naghuwat na lang sa desisyon sa korte ang kabanay sa mamahimong lintunganay sa kaso sa akusado. (report by Bombo Joann Gantalao/Glenda Sabenorio)
