CENTRAL VISAYAS- Gisuspinde ang mga biyahe sa dagat sa pipila ka mga pantalan sa amihanang Sugbo samtang giisa sa state meteorologist ang Storm Signal No. 1 tungod sa Bagyong Egay (internasyonal nga ngalan: Doksuri) gahapon, Lunes, Hulyo 24.
Subay niini, gipahibalo sa Cebu Port Authority (CPA) walay mga barko nga gitugotang makalawig gikan sa mga pantalan sa Hagnaya sa San Remigio; Santa Fe sa Bantayan Island; Maya sa Daanbantayan; ug Medellin.
Gikansela usab ang mga biyahe paingon ug gikan sa mga pantalan sa Poro ug Consuelo sa Isla sa Camotes, ingun man ang biyahe sa mga fast craft vessel nga nagbiyahe sa Cebu – Ormoc nga rota.
Ang mga shipping lines sama sa Jomalia Shipping gisuspenso usab ang mga biyahe sa dagat tungod sa balod sa kadagatan.
Sa advisory nga gipagawas gahapon Lunes, ang shipping firm nagkanayon nga kanselado ang mga biyahe sa mosunod nga mga rota: Danao-Consuelo/Consuelo-Danao; Punta Engaño- Olango/ Olango-Punta Engaño; ug Hagutapay hangtod sa Ormoc /Ormoc hangtod sa Hagutapay.
Nunot sa pagsuspenso sa mga biyahe sa dagat, ang CPA nakatala na og dili mominus 51 ka mga pasahero sa Hagnaya Port.
Gipataas sa Philippine Atmospheric Geophysical and Astronomical Services Administration (Pagasa) ang Tropical Cyclone Wind Signal (TCWS) No. 1 sa amihanang Sugbo.
Kini naglakip sa Daanbantayan, Medellin, Bantayan Islands ug Camotes Islands.
