Cebu City-Gipaabot na lamang sa kapulisan ang desisyon sa pamilya kon pasakaan ba og kaso ang amahan nga midunggab patay sa iyahang anak sa Brgy Candulawan, Minglanilla Cebu.
Ang biktima ang giila nga si Clemencio But-oy ,34 anyos, minyo samtang ang suspek mao ang amahan niini nga si Winifredo But-oy, 62 anyos ug puros residente sa nahisgutang lugar.
Matud ni PO3 Jelmer Naval,sa Minglanilla PNP nga nag inom ang biktima ug ang suspek sukad gahapon sa buntag hangtud nag gabii nalang gumikan sa ilang pagselebrar sa birthday ni Winefredo ug sa asawa niini.
Gumikan sa kahubog, nagmaoy matud pa ang biktima ug gisukmag niini ang iyahang amahan. Sa dihang na uwang ang duruha, misulod sa balay ang suspek apan gi-apas kini sa biktima.
Sa dihang padulong sulod pa lang sa balay si Clemencio, gihansakan na kini sa suspek og hinagiban nga para luba sa mga hayop.
Nakaangkon ug 8 ka samad dinunggaban sa iyahang buko-buko ug 2 ka samad sa dughan ang biktima nga miresulta sa iyahang hinanaling kamatayon.
Missurender usab sa Brgy. Kagawad ang suspek human sa insidente.
Nabalhog na kini karon sa Minglanilla lock up cell ug pasakaan ug kasong parricide sa higayon nga mukiha ang pamilya.
