CEBU CITY — Gipangita pa sa kapulisan kung unsa man ang mga anggulo sa pagpamanhig patay sa usa ka magsisibya sa Brgy. Piapi, dakbayan sa Dumaguete.
Giila ang maong biktima nga si Dindo Generoso, 67-anyos, ug residente sa Brgy. Banilad, sa nahisgutang dakbayan.
Matud ni Police Chief Master Sergeant Julito Deloria sa Dumaguete City PNP nga mibyahe si Generoso sa iyang sakyanan padung sa sibyaanang DYEM-FM alang sa iyang blocktime program.
Apan sa dihang milabay kini sa Hibbard Avenue, kalit nga miabot ang wala mailhi nga riding in tandem dayon og pusil ngadto sa biktima.
Gisuway og dala sa tambalanan ang biktima gumikan sa mga samad-pinusilan sa iyang lawas apan gideklarar kini nga dead on arrival.
Gisuta pa usab sa kapulisan kung may kalabutan ba sa trabaho ang pagpamanhig sa magsisibya samtang gipangita sa kapulisan kung kinsa ang responsable niini.
Si Generoso na ang ikaduhang biktima sa pagpamanhig sa Dumaguete City sukad nga unang nabiktima sa susamang insidente ang laing magsisibya nga si Edmund Sestoso niadtong Abril 2018.
Subay niini, mosulod na ang Department of Justice (DOJ) sa imbestigasyon sa pagpamanhig sa maong magsisibya.
Matud ni Justice Sec. Menardo Guevarra nga dilia gustong mahitabo pag-usab ang mga susamang krimen hinungdan nga gi-umol ang special investigating team nga mo-imbestigar sa krimen.
Read: DoJ bubuo ng task group para imbestigahan ang pagbaril-patay sa Dumaguete broadcaster
